میڈیا ہاوسز پر حملے،امریکہ کا اظہا رتشویش

واشنگٹن (مانیٹرنگ ڈیسک )امریکی محکمہ خارجہ کا کہنا ہے کہ پاکستان اور بھارت خطے کے اسٹریٹجک استحکام کے لیے تحمل سے کام لیتے ہوئے مذاکرات کریں۔ پاکستان میں میڈیا ہاوسز پر حملے اور سیاسی کارکنوں کی گرفتاری کی خبروں سے آگاہ ہیں۔امریکی محکمہ خارجہ کے ترجمان مارک ٹونر نے پریس بریفنگ کے دوران کہا کہ پاکستان، بھارت کے درمیان اعلیٰ سطح پر مذاکرات کی حوصلہ افزائی کرتے ہیں، خطے کے اسٹریٹجک استحکام کے لیے دونوں ملک تحمل سے کام لیں۔مارک ٹونر نے کہا کہ پاکستان کی جانب سے سی ٹی بی ٹی پر دستخط کی پیش کش کا جواب بھارت کو دینا ہے،تاہم اس کی عملی صورت یہی ہے کہ دونوں ممالک سی ٹی بی ٹی پر دستخط کردیں۔ایک سوال کے جواب پر مارک ٹونر کا کہنا تھا کہ پاکستانی سیکورٹی فورسز کی جانب سے متحدہ کے کارکنوں کی گرفتاریوں ، میڈیا ہاوس پر حملوں اور متحدہ کے مرکز نائن زیرو کو سیل کیے جانے کی خبروں سے اگاہ ہیں۔ترجمان محکمہ خارجہ نے کہا کہ جمہوری معاشرے میں تنقید کی حوصلہ افزائی کی جانے چاہئے، تنقید کرنے والی آوازوں کو خاموش نہیں کرانا چاہئے، آزاد رائے اور تنقید سے جمہوریتیں مضبوط ہوتی ہیں تاہم کسی بھی قسم کا اظہار پرامن طریقے سے ہونا چاہئے۔

Source: Daily Pakistan